“Добрая фатаграфія” гэта
ёсьць цалкам аб'ектыўнае паняцьце. Яно (у адрозьненьне ад іншых мастацтваў) мае
вельмі шырокую шкалу ацэнак і каштоўнасьцяў, што вынікае з самой прыроды
фатаграфіі, фэнамэнальнай сутнасьцю якой зьяўляецца якасьць, якую мы называем
“магія спыненага часу”.
Калісьці даўно, калі я спрабаваў зьбіраць старыя камэры, наш знакаміты Вячка Целеш прыслаў мне з Рыгі (разам з “Кодакам” 1914 года) старую пажоўклую павільённую фатаграфію, зьнятую пры дзённым сьвятле недзе на пераломе стагоддзяў. На здымку была маладая нямецкая дзяўчына вышэйшага сьвету ў прыгожай белай сукенцы. Яна глядзела проста ў аб'ектыў, і я ня мог адарваць погляду ад гэтых вачэй. У іх была яе душа. Я адразу адчуў, зразумеў ня толькі яе, але і той час, у якім яна была, атмасфэру павільёну; здавалася, нават чуў голас фатографа ў кацялку: “Bitte, Fräulein, schau zu...”
У гэтым адметнасьць яе
эстэтыкі, якая выяўляецца з цягам часу, прытым, бывае, уражвае так моцна, што
спараджае адчуваньне, блізкае да медытацыі. У гэтым шмат хто пераконваецца,
разглядаючы, скажам, даўнія фота сваіх сяброў, знаёмых, людзей і абставінаў
мінулага і далёкага існаваньня. Па ўплыве часу бывае, што некалі здавалася б
звычайнае аматарскае фота (нават здымак “на памяць”) выклікае ў нас трымценьне
душы і ўспрымаецца зусім па-іншаму, як ацэньваўся раней – 20, 30, 40 гадоў
таму.
Калісьці даўно, калі я спрабаваў зьбіраць старыя камэры, наш знакаміты Вячка Целеш прыслаў мне з Рыгі (разам з “Кодакам” 1914 года) старую пажоўклую павільённую фатаграфію, зьнятую пры дзённым сьвятле недзе на пераломе стагоддзяў. На здымку была маладая нямецкая дзяўчына вышэйшага сьвету ў прыгожай белай сукенцы. Яна глядзела проста ў аб'ектыў, і я ня мог адарваць погляду ад гэтых вачэй. У іх была яе душа. Я адразу адчуў, зразумеў ня толькі яе, але і той час, у якім яна была, атмасфэру павільёну; здавалася, нават чуў голас фатографа ў кацялку: “Bitte, Fräulein, schau zu...”
Уражаньне ўзьнікала ў выніку
калізіі паміж адчуваньнем і бачаньнем канкрэтнага вобраза канкрэтнай
рэальнасьці (эфект прысутнасьці) і ўсьведамленьнем, што гэтая рэальнасьць ўжо
не існуе (эфект адсутнасьці). Гэтая калізія і ёсьць адчуваньне спыненага
імгненьня, якім валодае фатаграфія.
Трэба разумець, аднак, што ў
аснове гэтага эфэкту ляжыць псіхалягічнае адчуваньне. Яно можа ўзьнікаць у
іншых жыцьцёвых абставінах пры сутыкненьні з матэрыяльнымі сьведчаньнямі
мінулага (у музэі, напрыклад, у археалагічным раскопе і г. д.). Але фатаграфія
стварае вобразны адбітак рэчаіснасьці па законах хараства, і гэта выклікае
якраз тое моцнае эстэтычнае перажываньне, пра якое мы тут гаворым.
Абазначаючы тэму “Добрая
фатаграфія”, я ня стаўлю задачу паказаць узровень майстэрства таго ці іншага
фатографа, ці пазнаёміць з шэдэўрамі прафэсійнай фатаграфіі (якія часам даволі
банальныя). У аснову гэтага адбору будзе пакладзена адлюстраваньне часу,
эмацыйнае ўражаньне вобразу, перажываньне чалавечага духу, адбіткі беларускай
культуры, хараство Зямлі і людзей, трагічны і вечны аспэкты чалавечага
існаваньня. Вобразнае ўражаньне і імгненьне часу будзе галоўным адборам.
Таму там, дзе гэтае
адчуваньне ёсьць, патрабаваньні да тэхнікі абробкі фатаграфіі будуць з майго
боку мінімальныя, нават калі гэтым адлюстраваньнем стане растравая фатаграфія з
газэты ці шматкротная рэпрадукцыя з паліграфічнага выданьня. Зразумела, што тут
будуць і аматарскія фатаграфіі, і фота невядомых (нявызначаных) аўтараў. Нікога
гэта не павінна бянтэжыць, калі ў фатаграфіі ёсьць унікальнасьць, хараство і
перажываньне духа. Вядома, прафэсійныя недахопы не скідаюцца з рахунку, але наш
прыярытэт аддаецца культурнай каштоўнасьці, уражаньню і вобразу.
Зянон Пазьняк.
No comments:
Post a Comment